Ministri i Bujqësisë: Kemi trashëguar nga PS kanale të ndërtuara pjesërisht, kanale të ndërtuara pa pasur burimin ujor
Qeveria ka investuar në një logjikë të
qartë dhe të mirë studiuar për t`i ardhur në ndihmë bujqësisë. Gjatë një
vizitë në zonën e Fierit, ku dhe u panë nga afër punimet në disa
projekte të ndryshme infrastrukturore, ministri i Bujqësisë, Ushqimit
dhe Mbrojtjes së Konsumatorit u shpreh se efektet e ndërhyrjeve kanë
qenë të menjëhershme në mbrojtjen e tokave. Ministri Genc Ruli tha se
logjika e ndërhyrjeve në infrastrukturën e kullimit, ujitjes dhe
mbrojtjes së tokave ka qenë në vijimësi të prioriteteve të qeverisjes
aktuale. Duke marrë shkas dhe nga disa deklarata të bëra së fundmi,
ministri i bujqësisë tha se impakti i projekteve të qeverisjes aktuale
ka qenë shumë i madh. “Mua më vjen mirë që kryetari i opozitës
ka pasur më së fundmi prononcim konkret për prioritetet që mund të
ndjekë PS në fushën e bujqësisë, duke cilësuar si të tillë ndërhyrjen në
ujitje dhe kullim. Më vjen mirë, dhe jam i bindur se kjo fjalë e thënë
me vonesë nga ana e tij vjen nga kuptimi i mirë që i ka bërë ai
politikave tona këto vite. Ne kemi pasur një qartësi të prioriteteve
tona në sektorin bujqësor, prioritetet gjatë mandatit të parë 2005-2009
dhe gjatë mandatit të dytë kanë qenë rrugët rurale, me një fond shumë
herë më të madh se ai i realizuar gjatë qeverisjes socialiste, sepse
rrugët i japin jetë dhe mundësi fshatit të lidhet me tregjeve. Ndërkohë
kemi vazhduar në fushë e ndërhyrjeve në kullim dhe ujitje, me projekte
shumë më efektive se ato të bëra në periudhën e qeverisjes socialiste
1999-2005, projekte që vuanin nga gjigando mania, projekte që në
qeverisjen socialiste kishin të madh vlerën e prokurimit, por shumë të
pakët impaktin e tyre. Faktikisht kemi trashëguar nga ata kanale të
ndërtuara pjesërisht, ose kanale të ndërtuara pa pasur burimin ujor
përkatës, hidrovorë që sot janë të braktisur sepse kane qenë të
panevojshëm, por me vlerë investimi shumë të mëdha, rreth 1 milionë
dollarë secili prej tyre. Ne jemi drejtuar te projektet që kanë impakt
të menjëhershëm, si në mbrojtjen e tokave por dhe ne ujitjen e tyre.
Kryeministri Berisha ka deklaruar që një vit më parë, që duke ndjekur
një logjike të qartë prioritetesh mandati tjetër do të jetë mandati i
ndërhyrjeve të mëdha në sistemin e ujitjes dhe kullimit. Unë uroj që
zoti Rama të na dëgjojë në prioritetet që ne vendosim, sepse politikat
tona kanë qenë shumë më realiste dhe të studiuara se sa ato që mund të
merrte natyrshëm model qeverisja socialiste”, – tha ministri Ruli.
Duke dhënë detaje për zonën e Fierit, në inspektimet e punimeve që po
bëhen për pastrimin edhe thellimin e kanalit të ujërave të larta Levan
–Pojan, ministri tha se: “Vlera e fondeve për këtë viti që ka pasur zona
e Fierit qoftë për shpenzime kapitale qoftë si fonde që i japim Bordit
të Kullimit është rreth 100 milion lekë, dhe kjo vlerë është
konsistente. Këto investime janë mëse të rëndësishme për këtë zonë
bujqësore. Projektet tona kanë qenë ndërhyrje efektive dhe po ndërhyjmë
në një kanal shumë të rëndësishëm, në kanalin e ujërave të larta Levan
–Pojan, kanal që mbron rreth 10 mijë hektarë tokë, ku nuk ishte ndërhyrë
prej mëse 25 vitesh”.
Për vitin 2012 në zonën e
Fierit, Ministria e Bujqësisë, Ushqimit dhe Mbrojtjes së Konsumatorit ka
ndërhyrë në disa objekte kryesore duke arritur të sigurojë ujitje,
kullimi dhe mbrojtje nga përmbytjet. Një ndër zërat kryesorë të
investimeve është mbrojtja nga gërryerjet e lumit Vjosë në afërsitë
fshatit Varibob, ku si fazë e parë e ndërhyrjeve për vitin 2012, me
vlerë 40 milion lekë janë ndërtuar 3 panele tërthore. Në vijim gjatë
vitit të ardhshëm do të ndërtohen edhe 4 panele të tjera duke garantuar
mbrojtjen e tokës bujqësore në këtë zonë. Po gjatë këtij viti, me një
vlerë totale prej 24 milion lekësh është arritur që me ekskavatorët e
Bordit të Kullimit Fier të pastrohet dhe thellohet kanali i Ujërave të
Larta Levan-Pojan. Brenda pak javësh mbyllen punimet që do të sjellin
pastrimin dhe thellimin e plotë të rreth 8.3 kilometrave me një volum
prej 350 mijë metër kub dhera të lëvizura. Ky kanal është i rëndësishëm
pasi mbron nga përmbytja rreth 10 mijë hektarë tokë bujqësore që i
përkasin komunave Dërmenas dhe Levan.
No comments:
Post a Comment